generant, ac ne convallem quidem usquam, nisi tantùm ripæ fluvialis marginem densis arboribus septam video. Hæ arbores in lauri faciem prolixè foliatæ, pariunt in modum floris inodori porrectos caliculos modicè punicantes : quos equidem flagrantis, minimè rurestri vocabulo vulgus indoctum rosas laureas appellant ; quarumque cuncto pecori cibus letalis est.
Talibus satis implicitus, etiam ipsam salutem recusans, sponte illud venenum rosarium sumere gestiebam. Sed dùm contanter accedo decerpere, juvenis quidam, ut mihi videbatur, hortulanus, cujus omnia prorsùs olera vastaveram, tanto damno cognito, cum grandi baculo furens decurrit ; arreptumque me totum plagis obtundit adusque vitæ ipsius periculum : nisi tandem sapienter alioquin ipse mihi tulissem auxilium. Nam lumbis elevatis in altum, pedum posterioribus calcibus jactatis in eum crebriter, jàm mulcato graviter atque jacente contrà proclive montis attigui fuga me liberavi.
Sed illicò mulier quæpiam, uxor ejus scilicet, simul eum prostratum et semianimem ex edito despexit, ejulabili cum plangore ad eum statim prosilit, ut sui videlicèt miseratione mihi præsens crearet exitium.
