efferantur, passimque circumfusi, nudatum supinatumque juvenem execrandis uredinibus flagitabant.
Nec diù tale facinus mei oculis tolerantibus, Porrò quirites proclamare gestivi, sed viduatum cæteris syllabis ac literis præcessit O tantùm, sanè clarum ac validum, et asino proprium, sed inopportuno planè tempore. Nàmque de pago proximo complures juvenes, abactum sibi noctu perquirentes asellum, nimioque studio cuncta diversoria scrutantes, intus ædium audito ruditu meo, prædam absconditam latibulis ædium rati, coràm rem invasuri suam, improvisi conferto gradu se penetrant : palàmque illos, execrandas fœditates obeuntes deprehendunt.
Jàm jàmque vicinos undique percientes, turpissimam scenam patefaciunt : insuper ridiculè sacerdotum purissimam laudantes castimoniam. Hac infamia consternati, quæ per ora populi facilè dilapsa, meritò invisos ac detestabiles eos cunctis effecerat, noctem fermè circà mediam, collectis omnibus, furtim castello facessunt, bonaque itineris parte ante jubaris ortum transacta, jàm die claro solitudines avias nacti, multa secum priùs collocuti, accingunt se meo funeri :
