Ad istum modum, divinationis astu captioso contraxerant non parvas pecunias. Sed assiduis interrogationibus, argumenti satietate jàm defecti, rursùm ad viam prodeunt, viâ totâ quàm nocte confeceramus longè pejorem, quidni ? lacunosis incilibus voraginosam, partim stagnanti palude fluidam, et alibi subluviè cœnosa lubricam. Crebris denique offensaculis et assiduis lapsibus jàm contusis cruribus meis, vix tandem ad campestres semitas fessus evadere potui. Et ecce, nobis repentè de tergo manipulus armati supercurrit equitis : ægreque cohibita equorum curruli rabie, Philebum cæterosque comites ejus involant avidi : colloque constricto, et sacrilegos impurosque compellantes, interdum pugnis obverberant : nec non manicis etiam cunctos coartant : et idemtidem urgenti sermone comprimunt, promerent ocyus aureum cantharum, promerent auctoramentum illud sui sceleris : quod, simulatione sollemnium, quæ in operto factitaverant, ab ipsis pulvinaribus matris Deorum clanculo furati, prorsus quasi pos-
