obtestationibus ejus multum ac diù fatigata, tandem abire concessit. Interdùm perniciem cæcam totis visceribus furentem, medullæ penitus attraxerant, multum denique saucius, et gravedine somnolenta jàm demersus, domum pervadit ægerrimè. Vixque enarratis cunctis ad uxorem mandat, saltem promissam mercedem mortis geminatæ deposceret. Sicque elisus violenter spectatissimus medicus, effudit spiritum.
Nec ille tamen juvenis diutius vitam tenuerat : sed inter fictas mentitasque lacrymas uxoris, pari casu mortis fuerat extinctus. Jàmque eo sepulto, paucis interjectis diebus, quis feralia mortuis litantur obsequia, medici uxor pretium geminæ mortis petens aderat. Sed mulier usquequaque suæ simulatæ fidei supprimens faciem, prætendens imaginem, blandiculè respondit : et omnia prolixè accumulateque pollicetur, et statutum præmium sine mora se reddituram constituit ; modò pauxillum de ea potione largiri sibi vellet, ob incœpti negotii persecutionem. Quid pluribus ? laqueis fraudium pessimarum uxor inducta medici, facilè consentit : et, quò se gratiorem locupleti feminæ faceret properiter domo petita,
