L. APULEII,
MADAURENSIS PLATONICI,
METAMORPHOSEOS :
SIVE
LUSUS ASINI.
LIBER UNDECIMUS.
Circa primam fermè noctis vigiliam experrectus pavore subitò, video præmicantis lunæ candore nimio completum orbem, commodùm marinis emergentem fluctibus. Nactusque opacæ noctis silentiosa secreta, certus etiam summatem Deam præcipua majestate pollere, resque prorsus humanas ipsius regi providentia ; nec tantùm pecunia et ferina, verùm inanima etiam divino ejus luminis numinisque nutu vegetari : ipsa etiam corpora terra, cœlo, marique, nunc incrementis consequenter augeri : nunc decrementis obsequenter imminui, fato scilicèt jàm meis tot tantisque cladibus satiato, et spem salutis, licet tardam, subministrante, augustum specimen Deæ præsentis statui deprecari. Confestimque discussa pigra
