sus omnes vino sepulti jacebant, omnes passim parati mortui.
Tunc nullo negotio artissimis vinculis impeditis, ac pro arbitrio suo constrictis illis, imposita dorso meo puella, dirigit gressum ad suam patriam. Quam simul accessimus ; tota civitas ad votivum conspectum effunditur. Procurrunt parentes, affines, clientes, alumni, famuli, læti, faciem gaudio delibuti. Pompam cerneres omnis sexus, et omnis ætatis, novumque et hercules memorandum spectamen, virginem asino triumphantem. Denique ipse etiam hilarior pro virili parte, ne præsenti negotio ut alienus discreparem : porrectis auribus, proflatisque naribus, rudivi fortiter, immò tonanti clamore personui.
Et illam thalamo receptam commodè parentes sui fovebant : me verò cum ingenti jumentorum civiumque multitudine,
