Ea protinùs gnaviter, et aliquanto liberalius partim ipse, partim per meos socios coemenda procuro. Jamque tempore, ut ajebat sacerdos, id postulante, stipatum me religiosa cohorte deducit ad proximas balneas : et prius sueto lavacro traditum, præfatus Deorum veniam, purissimè circumrorans, abluit ; rursumque ad templum reductum, jàm duabus diei partibus transactis, ante ipsa Deæ vestigia constituit ; secretoque mandatis quibusdam, quæ voce meliora sunt, illud planè cunctis arbitris præcipit, decem continuis illis diebus cibariam voluptatem coercerem, neque ullum animal essem, et invinius essem. Quibus venerabili continentiâ ritè servatis, jàm dies aderat divino destinatus vadimonio ; et sol curvatus intrahebat vesperam. Tunc ecce confluunt undique turbæ, sacrorum ritu vetusto, variis quisque me muneribus honorantes. Tunc semotis procul profanis omnibus, linteo undique contectum amicimine, arrepta manu, sacerdos deducit ad ipsius sacrarii penetralia.
Quæras forsitan satis anxiè, studiose
