Exemple de Balade de neuf vers toute leonyne :
Vous qui avez pour paſſer voſtre vie,
Qui chaſcun jour ne fait que deſenir,
Vous vivez frans, ſans viande ravie.
Se du voſtre vous povez maintenir,
Or vous vueilliez du serf lieu tenir,
Où pluſeurs par convoitiſe
Ont perdu corps, eſperit & franchiſe ;
C’eſt de ſervir autrui, dont je me laſſe.
Vieilleſſe vient, guerdon fault, temps ſe paſſe.
Exemple de Balade de dix vers, de dix & onze ſillabes :
Et ſe doit-on toujours garder, en faiſant Balade qui puet, que les vers ne ſoient pas de meſmes piez, mais doivent eſtre de neuf ou de dix, de ſept ou de huit ou de neuf, ſelon ce qu’il plaiſt au faiſeur ſanz les faire tous égaulx, car la Balade n’en eſt pas ſi plaiſante ne de ſi bonne façon.
Pour quoy fina par venin Alixandre,
Qui ſi puiſſans fu & ſi fortunez
Que le monde ſoubmiſt en aage tendre,
Et commença quinze ans puis qu’il fu nez
A conquérir : comment fu deſtinez
Cilz qui conquiſt Ynde, ce fut Pompée,
Apres Theſſale ot la teſte couppée ;
Et Égipte le fiſt ly roys fenir
