Cette page a été validée par deux contributeurs.
27
des sonnets
Sonnet
Icare eſt cheut icy le ieune audacieux,
Qui pour voler au Ciel eut aſſez de courage :
Icy tomba ſon corps degarni de plumage
Laiſſant tous braues cœurs de ſa cheute enuieux.
O bien-heureux travail d’vn eſprit glorieux,
Qui tire vn ſi grand gain d’vn ſi petit dommage !
O bien-heureux malheur plein de tant d’auantage,
Qu’il rende le vaincu des ans victorieux !
Vn chemin ſi nouueau, n’eſtonna ſa ieuneſſe,
Le pouuoir luy faillit mais non la hardieſſe.
Il eut pour le brûler des aſtres le plus beau.
Il mourut pourſuiuant vne haute aduenture,
Le Ciel fut ſon deſir, la Mer ſa ſepulture,
Eſt-il plus beau deſſein, ou plus riche tombeau ?
Philippe Deſportes.
