Page:Béroul - Le Roman de Tristan, par Ernest Muret, 1922.djvu/26

La bibliothèque libre.
Cette page a été validée par deux contributeurs.

Donc ne vos en est pitié prise ?
Dame, je vos en cri merci :
160Tenez moi bien a mon ami.
Qant je vinc ça a lui par mer…
Com a seignor i vol torner.
— Par foi, sire, grant tort avez,
164Qui de tel chose a moi parlez
Que de vos le mete a raison
Et de s’ire face pardon.
Je ne vuel pas encor morir
168Ne moi du tot en tot perir.
Il vos mescroit de moi forment,
Et j’en tendrai le parlement ?
Donc seroie je trop hardie.
172Par foi, Tristran, n’en ferai mie,
Ne vos nu me devez requerre.
Tote sui sole en ceste terre.
Il vos a fait chanbres veer
176Por moi : s’il or m’en ot parler,
Bien me porroit tenir por fole.
Par foi, ja n’en dirai parole ;
Et si vos dirai une rien,
180Si vuel que vos le saciés bien :
Se il vos pardounot, beau sire,
Par Deu, son mautalent et s’ire,
J’en seroie joiose et lie.
184S’or savoit ceste chevauchie,
Cel sai je bien que ja resort,
Tristran, n’avreit contre la mort.
Vois m’en, imais ne prendrai some.
188Grant poor ai que aucun home
A moi vos ait ci veü venir.
S’un mot en puet li rois oïr