Page:Béroul - Le Roman de Tristan, par Ernest Muret, 1922.djvu/52

La bibliothèque libre.
Cette page a été validée par deux contributeurs.

1008Tristran respont : « Trop vus anoie !
Beau mestre, n’ai point de m’espee.
— Si as, que je l’ai aportee. »
Dist Tristran : « Maistre, donc est bien.
1012Or ne criem, fors Deu, imais rien.
— Encor ai je soz ma gonele
Tel rien qui vos ert bone et bele :
Un hauberjon fort et legier,
1016Qui vos porra avoir mestier.
— Dex ! » dist Tristran, « balliez le moi.
Par icel Deu en qui je croi,
Mex vuel estre tot depecié,
1020Se je a tens i vien, au ré,
Ainz que getee i soit m’amie,
Ceus qui la tienent nen ocie. »
Governal dist : « Ne te haster.
1024Tel chose te puet Dex doner
Que te porras mot mex venger ;
N’i avras pas tel destorbier
Con tu porroies or avoir.
1028N’i voi or point de ton pooir,
Quar vers toi est iriez li rois ;
Avocques sont tuit li borjois
Et trestuit cil de la cité.
1032Sor lor eulz a toz conmandé
Que cil qui ainz te porra prendre,
S’il ne te prent, fera le pendre.
Chascun aime mex soi qu’autrui :
1036Se ja levout sor toi le hui,
Tex te voudroit bien delivrer,
Ne l’oseret neis porpenser. »
Plore Tristran, mot fait grant duel.
1040Ja, por toz ceus de Tintajol,