Et poise m’en, por sa franchise,
Que il la mort a ici quise.
Grant nature li faisoit fere ;
Mais conment m’en pus je retraire ?
Certes, ce poise moi mot fort
Que je li doie doner mort.
Or m’en aidiez a consellier :
De nos garder avon mestier. »
Yseut li dist : « Sire, merci !
Li chiens sa beste prent au cri,
Que par nature, que par us.
J’oï ja dire qu’un seüs
Avoit un forestier galois,
Puis que Artus en fu fait rois,
Que il avoit si afaitié :
Qant il avoit son cerf sagnié
De la seete berserece,
Puis ne fuïst par cele adrece
Que li chiens nel suïst le saut ;
Por crïer n’estonast le gaut
Ne ja n’atainsist tant sa beste
Que criast ne feïst moleste.
Amis Tristran, grant joie fust,
Por metre peine qui peüst
Faire Hudent le cri laisier,
Sa beste ataindrë et chacier. »
Tristran s’estut et escouta.
Pitié l’en prist ; un poi pensa,
Puis dist itant : « Se je pooie
Husdent par paine metre en voie
Que il laisast cri por silence,
Mot l’avroie a grant reverence.
Page:Béroul - Le Roman de Tristan, par Ernest Muret, 1922.djvu/69
Apparence
Cette page a été validée par deux contributeurs.