Léroi tonné :
— Aile çace moi bonhomme Flanquère, amène li ici.
Lhére Flanquère fine vini, léroi dimande li comme ça :
— Mais, acote to fine gagne tout ça larzent là, donc ?
Flanquère dire li :
— Mo té gagne éne vace ; vace là fine mort ; mo corce li, mo méte so lapeau sec; lhére lapeau là bien sec, mo vende li : ça même mo fine gagne bonbon morceau larzent.
Léroi blizé bavé. Li maziné : « Mais moi qui gagne grandgrand troupeau beifs, quand mo touye zaute pour vende zaute lapeau, mo va gagne plis boucoup larzent qui Flanquère. »
Léroi faire touye tout so beifs, li faire tire tout lapeau, li mette lapeau sec, li çarze lapeau sec lahaut çarette, li envoyé vende. Personne napas voulé aceté. Çarette roulé, çarette roulé, lapeau pourri, blizé zété à force li pie.
Léroi en colère, couri lacase Flanquère.
Coment Flanquère trouve léroi vini dans loinloin, li mette vitement éne marmite lasoupe lahaut grand difé. Lhére marmite bien bouï, li tire li lahaut difé, li mette li dans miliè grand cimin.
