veu qu’en soy elle se resguardoyt comme acquise à René, Blanche, en retour des fleurs de vieillesse que lui offroyt Bruyn, le dorelotoyt, lui soubrioyt, le maintenoyt en ioye, le papelardant avecques les manières et fassons gentilles dont usent les bonnes femmes envers les marys qu’elles truphent ; et tout si bien, que le senneschal ne vouloyt point mourir, se quarroyt dans sa chaire, et tant plus vivoyt, tant plus s’accoustumoyt à la vie. Mais, brief, ung soir, il trespassa, sans bien sçavoir où il alloyt ; car il disoyt à Blanche : — Ho ! ho ! ma mye, ie ne te veois plus ! Est-ce qu’il faict nuict ?
C’estoyt la mort du iuste, et il l’avoyt bien méritée pour loyer de ses travaulx en Terre-Saincte.
Blanche mena de ceste mort ung grant et vray deuil, le plourant comme on ploure ung père. Elle demoura mélancholicque, sans vouloir prester l’aureille aux musicques des secundes nopces ; ce dont elle feut louée des gens de bien, lesquels ne sçavoyent point que elle avoyt ung espoux du cueur, une vie en espérance ; mais elle estoyt la plupart du temps veufve de faict et veufve de cueur pour ce que, n’oyant aulcunes nouvelles de son amy le croisé, la paouvre comtesse le reputoyt mort ; et, pendant certaines nuicts, le voyant navré, gisant au loing, elle se resveigloyt toute en larmes. Elle vescut ainsy quatorze années dans le soubvenir d’ung seul iour de bonheur. Finalement, un iour où elle avoyt avecques elle aulcunes dames de Touraine, et que elles devisoyent après disner, vécy son petit gars, lequel avoyt lors environ treize ans et demy, et ressembloyt à René plus que n’est permis à ung enfant de ressembler à son père, et n’avoyt rien de feu Bruyn que le nom, vécy ce petit, fol et gentil comme sa mère, qui revint du iardin, tout courant, suant, eschauffé, hallebottant, graphignant toutes chouses sur son passaige, suivant les us et coustumes de l’enfance, et qui court sus à sa mère bien aymée, se gecte en son giron ; puis, rompant les devis d’ung chascun, luy cria :
