Philippe doncques, repensant à la franche lippée qu’il avoit eue par les yeulx la veille, se doubta que ce seroit tout. Lors, feut chagrin ; et, sans mangier ne boire, se pourmena par la ville, en attendant l’heure, d’autant qu’il estoyt cocquet et guallant assez pour en treuver d’autres moins rudes au montoir que n’estoyt madame Impéria.
La nuict venue, le ioly petit Tourangeau, tout relevé d’orgueil, caparassonné de dezirs et fouetté par ses Helas ! qui l’estouffoyent, se coula comme un anguille au logiz de la véritable royne du Concile : car devant elle s’abaissoyent toutes les authoritez, sciences et prud’hommies de la chrestienté. Le maistre d’hostel le desconnut et l’alloyt jecter dehors, quand la chamberière dit, du hault des degrez : — Eh ! messire Imbert, c’est le petit de Madame. Et le paouvre Philippe, rouge comme une nuict de nopces, monta la vis en bronchant d’heur et d’aise. La chamberière le print par la main et le mena dans la salle où piaffoyt désià Madame, lestement nippée en femme de couraige qui attend mieulx. La lucidifique Impéria estoyt assise près une table couverte de nappes peluchées, garnies d’or, avecques tout l’attirail de la meilleure beuverie. Flacons de vin, hanaps altérez, bouteilles d’hypocras, grez pleins de bon vin de Chyppre, drageoires combles d’espices, paons rostis, saulces vertes, petits iambonneaux salez, auroient resiouy la veue du guallant, s’il n’avoyt pas tant aymé madame Impéria. Elle veit bien que les yeulx de son petit prebstre estoyent tout à elle. Quoique coustumière des parpaillotes dévotions des gens d’Ecclise, elle feut bien contente, pour ce qu’elle s’estoyt affolée nuictamment du paouvre petit, qui, toute la iournée, lui avoyt trotté dans le cueur. Les vitres avoyent esté closes, Madame estoyt bien dispose et attournée comme pour faire honneur à ung prince de l’Empire. Aussi le fripon, béatifié par la sacro-saincte beauté d’Impéria, cogneut-il que empereur, burgrave, voire ung cardinal en train d’estre esleu pape, n’auroyt raison ce soir contre luy, petit prebstre, qui, dans sa bougette, ne logeoyt que le diable et l’amour. Il trencha du seigneur, et se iacta, en la saluant avecques une courtoisie qui n’estoyt point du tout sotte ; et pour lors, la dame lui dit, en le festoyant par ung cuisant resguard : — Mettez-vous près de moy, que ie voye si vous estes changé d’hier.
— Oh oui !… feit-il.
— Et d’où ?… dit-elle.
