les fraizes dedans le bahut de monseigneur, alors que il avoyt ioué avec sa iuppe à elle et que elle se estoyt retournée, disant :
— Finez, monseigneur !
— Tout est dict, feit le iuge, veu que par ceste parole il ha cuydé que tu lui bailloys congé de finer vifvement. Ha ! ha !
La belle fille dit que elle se estoyt deffendue en plourant et criant, ce qui faisoyt le viol.
— Chiabrenas de pucelle pour inciter ! feit le iuge.
En fin de tout, la Portillonne dit que, maulgré son vouloir, elle se estoyt sentue prinse par la ceincture, et acculée au lict, après que elle avoyt moult saulté, moult crié, ains que, ne voyant nul secours advenir, elle avoyt perdu couraige.
— Bon ! bon ! feit le iuge, avez-vous eu plaisir ?
— Non, feit-elle. Mon dommaige ne sçauroyt se payer que par mille escuz d’or.
— Ma mye, feit le iuge, ie ne reçois point vostre plaincte, veu que ie cuyde nulle fille ne estre violée que de grand cueur.
— Ha ! ha ! monsieur, feit-elle en plourant, interroguez vostre servante, et oyez ce que elle vous en dira.
La servante affera que il y avoyt des viols plaisans et des viols trez-maulvais ; que si la Portillonne n’avoyt perceu ny deniers ny plaisir, il lui estoyt deu plaisir ou deniers. Ce saige advis gecta le iuge en trez-grant perplexité.
— Iacqueline ! feit-il, paravant que ie soupe, ie veux grabeler cecy. Ores çà, va querir mon ferret avecques un fil rouge à lier les sacs à procez.
Iacqueline vint avec ung ferret troué d’ung ioly chaz en toute perfection et ung gros fil rouge comme en usent gens de iustice. Puis, la servante demoura en pieds, à veoir iuger la requeste, trez-esmeue, ainsy que la belle fille, de ces préparatoires mystigoricques.
— Ma mye, feit le iuge, ie vais tenir le passe-filet, dont le chaz est grant assez pour y enfiler sans poine ce bout. Si vous l’y boutez, ie me charge de vostre cause et feray cracher Monseigneur au bassinet par ung compromis.
— Que est de cecy ? feit-elle. Ie ne veulx point le promettre.
— Ce est ung mot de iustice pour signifier ung accord.
— Ung compromis est doncques les accordailles de la iustice ? dit la Portillonne.
— Ma mye, le viol vous ha aussy ouvert l’esperit. Y estes-vous ?
— Oui, feit-elle.
