La dame d’Azay, ayant baillé son fief en gaige aux lombards et torssonniers, affin de faire la somme, restoyt sans ung piestre denier, attendant le sire dans ung paouvre logiz de la ville, sans ung tapis pour se seoir, mais fière comme la royne de Saba, et brave comme ung levrier qui deffend les nippes de son maistre. Voyant ceste grant destresse, le senneschal s’en alla délicatement requérir la demoiselle d’Azay d’estre la marraine de ladicte Ægyptiacque, pour ce qu’il auroyt le droict de bien faire à la dame d’Azay. Et, de faict, il gardoyt une lourde chaisne d’or, emblée à la prinse de Chyppre, qu’il déliberoyt d’agrapher au col de sa gentille commère ; ains il y pendit son domaine et ses cheveulx blancs, ses besans et ses hacquenées ; brief, il y mit tout, si tost qu’il eut veu Blanche d’Azay dançant une pavant parmy les dames de Tours. Quoique la Moresque, qui s’en donnoyt pour son dernier iour, eust estonné l’assemblée par ses tourdions, voltes, passes, bransles, élévations en tours de force, Blanche l’emporta sur elle, au dire de tous, tant elle dança virginalement et mignonnement.
Ores, Bruyn, en admirant ceste gente damoiselle, dont les chevilles avoyent paour du planchier et qui se divertissoyt ingenuement pour ses dix-sept ans, comme une cigale en train d’essayer sa chanterelle, feut bouclé par ung dezir de vieillard, dezir apoplecticque et vigoureux de foiblesse, qui le chauffa de la semelle à la nuque seulement, car son chief avoyt trop de neige pour que l’amour s’y logeast. Lors le bonhomme s’aperceut qu’il lui manquoyt une femme en son manoir, et si le veit-il plus triste qu’il ne l’estoyt. Et qu’estoyt doncques ung chastel sans chastelaine ? … autant dire ung battant sans sa cloche. Brief, une femme estoyt la seule chouse qu’il eust à dezirer : aussy la vouloyt-il promptement, veu que, si la dame d’Azay le faisoyt attendre, il avoyt le temps d’yssir de cettuy monde en l’aultre. Mais, pendant le divertissement baptismal, il songea peu à ses griefves blessures, et encores moins aux quatre-vingts ans bien sonnez qui luy avoient desguarny la teste ; il trouva ses yeulx clairs assez, pour ce qu’il voyoyt trez-apertement sa ieune commère, laquelle, suyvant les commandemens de la dame d’Azay, le festoyoyt trez-bien de l’œil et du geste, cuydant qu’il n’y avoyt aulcun dangier près de ce vieulx compère. En sorte que Blanche, naïfve et nice qu’elle estoyt, au rebours de toutes les garses de Touraine, lesquelles sont esveiglées comme ung matin de printemps, permit au bonhomme
