guallant du monde ; et, se dressant sur son séant, elle se print à soubrire, et veit avecques encores plus de ioye ce beau lict de brocart vert, où doresnavant il luy estoyt loisible et sans faulte de dormir toutes les nuicts. La voyant preste à iouer, le rusé seigneur, qui avoyt peu rencontré de pucelles, et sçavoit, par mainte expérience, combien les femmes sont cinges sur la plume, veu qu’il s’estoyt tousiours esbattu avecques des galloises, redoutoyt les ieux manuels, baisers de passaige, et les menus suffraiges d’amour, auxquels iadis ne faisoyt deffault, mais qui présentement l’auroyent treuvé froid comme l’obit d’ung pape. Doncques, il se recula devers le bord du lict, en craignant son heur, et dit à sa trop délectable espouse : Hé bien ! ma mye, vous voilà ores senneschalle, et de faict très-bien senneschaussée. — Oh ! non, feit-elle.
— Comment, non ? respondit-il en grant paour, n’estes-vous pas dame ?
— Non, feit-elle encores. Ne la seray que si i’ai ung enfant !
— Avez-vous veu les prées en venant ? reprit le bon compère.
— Oui, feit-elle.
— Eh bien, elles sont à vous…
— Oh ! oh ! respondit-elle en riant, ie m’amuseray bien à y querir des papillons.
— Voilà qui est saige, dit le seigneur. Et les bois ?
— Ah ! ie ne sçauroys y estre seule, et vous m’y mènerez. Mais, dit-elle, baillez-moy ung petit de ceste liqueur que la Ponneuse ha faicte avecques tant de soing pour nous.
— Et pourquoy, ma mye ? Vous vous bouteriez le feu dedans le corps.
— Oh ! si veulx-je, feit-elle en grignottant de despit, pour ce que ie dezire vous donner au plus tost ung enfant ; et bien veois-je que ce breuvage y sert !
— Ouf ! ma petite ! dit le senneschal, cognoissant à cecy que Blanche estoyt pucelle de la teste aux pieds, le bon vouloir de Dieu est premièrement nécessaire pour cet office ; puis les femmes doibvent estre en estat de fenaison.
— Et quand serai-je en estat de fenaison ? demanda-t-elle en soubriant.
— Lorsque la nature le vouldra, dit-il en cuydant rire.
— Et pour ce, que faut-il faire ? reprint-elle.
— Bah ! une opération caballisticque et d’alquemie, laquelle est pleine de dangiers.
