roles. Mais voulez-vous en achepter ung tout venu ? Il ne vous coustera ni peine ni douleur.
— Vère, dit-elle, ie veux la peine et la douleur ; faulte de quoy, point ne seroyt nostre. Ie sçay bien qu’il doibt yssir de moy, puisqu’à l’ecclise on dict Jésus estre le fruit du ventre de la Vierge.
— Adoncques, prions Dieu que cela soit ainsy, s’écria le senneschal, et intercédons la Vierge de l’Esgrignolles. Bien des dames ont conceu après des neufvaines ; il ne faut manquer à en faire une.
Alors, le iour mesme, Blanche se despartit vers Nostre-Dame de l’Esgrignolles, attournée comme une royne, montant sa belle hacquenée, ayant sa robe de velours verd, lassée d’un fin lasset d’or, ouverte à l’endroit des tettins, ayant mancherons d’escarlatte, petits pattins, ung hault chapperon guarny de pierreries et une ceincture dorée qui monstroyt sa taille fine comme gaule. Elle vouloit donner son aiustement à madame la Vierge ; et, de faict, le luy promit pour le iour de ses relevailles… Le sire de Montsoreau chevaulchoyt devant elle, l’œil vif comme celluy d’une bondrée, faisant renger le monde, et veiglant avecques ses cavaliers à la sécurité du voyaige. Prouche Marmoustiers, le senneschal, endormy par la chaleur, veu qu’on estoyt en aoust, tresbilloyt sur son destrier, comme ung diadesme sur la teste d’une vache, et, voyant si follastre et si gentille dame près d’ung si vieulx braguard, une de la campaigne, qui estoyt accropie au tronc d’ung arbre et beuvoyt de l’eau en son grez, s’enquit d’une larronnesse édentée, laquelle gaignoyt misère en glanant, si cettuy princesse s’en alloyt noyer la mort.
— Nenny ! feit la vieille. C’est nostre dame de la Roche-Corbon, la senneschalle de Poictou et de Touraine, en queste d’ung enfant.
— Ah ! ah ! dit la ieune garse en riant comme une mousche defferrée. Puis, monstrant le seigneur desgourd qui estoyt en hault du convoy : — Cil qui marche en teste l’y boutte, elle fera l’espargne de la cire et du vœu.
— Hau ! ma mignonne, repartit la larronnesse, ie m’esbahis fort que elle aille à Nostre-Dame de l’Esgrignolles, veu que les prebstres n’y sont point beaulx. Elle pourroyt trez-bien s’arrester une aulne de temps à l’umbre du clochier de Marmoustiers, elle seroyt tost fécunde, tant sont vivaces les bons pères !
— Foing des religieux ! dit une mestivière en se resveiglant.
