Voyez ! Le sire de Montsoreau est flambant et mignon assez pour ouvrir le cueur de ceste dame, d’autant qu’il est ià fendu.
Et toutes se prinrent à rire. Le sire de Montsoreau voulut aller à elles et les branchier à ung tilleul du chemin, en punition de leurs maulvaises paroles ; mais Blanche s’écria vifvement : — Oh ! messire, ne les pendez point encore ! Elles n’ont pas tout dict ; et nous verrons au retour.
Elle rougit, et le sire de Montsoreau la resguarda iusqu’au vif, comme pour lui darder les mysticques compréhensions de l’amour ; mais le déburelecocquement de son intelligence estoyt desià commencé par les dires de ces paysannes, qui fructifioyent dans son entendement. Ledict pucelaige estoyt comme amadou, et n’estoyt besoing que d’ung mot pour l’enflammer.
Aussy Blanche veit-elle ores de notables et physicques différences entre les qualitez de son vieil mary et les perfections dudict Gauttier, gentilhomme qui n’estoyt point trop affligé de ses vingt-trois ans, se tenoyt droict comme quille en sa selle, et resveiglé comme ung premier coup de matines, quand, au rebours, dormoyt le senneschal ; ayant bon couraige et dextérité, là où son maistre deffailloyt. C’estoyt ung de ces fils goldronnez dont les fricquenelles se coëffent de nuit plus voulentiers que d’un escoffion, pour ce qu’elles ne craignent plus les puces ; il y en ha aulcunes qui les en vitupèrent ; mais ne faut blasmer personne, car ung chascun doibt dormir à sa phantaisie.
Tant feut songé par la senneschalle et si impérialement bîen, que, en arrivant au pont de Tours, elle aymoyt Gauttier occultement et patepeluement, comme ayme une pucelle, sans se doubter de ce que estoyt l’amour. Doncques, elle devint femme de bien, c’est-à-dire soubhaitant le bien d’aultruy, ce que les hommes ont de meilleur. Elle cheut en mal d’amour, allant de prime sault à fund de ses mizères, veu que tout est feu entre la première convoitise et le darrenier dezir. Et ne sçavoyt pas, comme elle l’apprit lors, que, par les yeulx, pouvoyt se couler une essence subtile causant si fortes corrosions en toutes les veines du corps, replis du cueur, nerfs des membres, racines des cheveulx, transpirations de la substance, limbes de la cervelle, pertuys de l’épiderme, sinuositez de la fressure, tuyaux des hypocondres et aultres, qui, chez elle, feurent soubdain dilatez, eschauldez, chatouillez, envenimez, graphignez, herrissez et fringuans, comme si mille pannerées d’esguilles se treuvoyent en elle. Ce feut une envie de
