que j’en parlasse de sa part a la reine, et qu’il appuieroit mon discours : ce que je fis par plusieurs fois, tant devant le dit marquis qu’en son absence.
Cependant l’accommodement de Mr de Guyse avec Mr le Prince s’achevoit, et Mr de Guyse me pria de ne parler plus a la reine de la Rochefoucaut, parce que Mr le Prince luy avoit promis de le faire rappeller, avesques lequel Mr de Guyse me dit qu’il se mettroit a l’avenir sy bien que, quand la reine seroit fachée contre luy, ce ne seroint plus les verges avesques lesquelles elle le fouetteroit.
Or, Mr le Prince et ces messieurs (tenant Mr de Guyse en leur devotion, et Mr d’Espernon traittant aussy avesques eux pour s’y reunir, les ministres ayans esté decredités), creurent avoir empieté toute l’autorité, et commencerent [a penser a leur establissement. Ils commencerent][1] par la demande du Chasteau-Trompette[2] pour Mr le Prince, disans qu’il n’estoit pas raysonnable que, dans la ville capitale du gouvernement d’un premier prince du sang, il y eut une citadelle quy ne despendit de luy. On fit premierement courir le bruit par la court, que la reine luy avoit donné cette capitainerie, pour voir comme cela seroit pris, et pour disposer la chose, comme de tous ces derniers temps on en a ainsy usé, de faire prevenir par des bruits les choses que l’on a envie de faire. La reine fut avertie de ce bruit, et mesmes on luy dit que l’on
