Page:Bassompierre - Journal de ma vie, 2.djvu/139

La bibliothèque libre.
Aller à la navigation Aller à la recherche
Le texte de cette page a été corrigé et est conforme au fac-similé.
135
1618. avril.

seil. Mr d’Espernon porta la parole au roy devant ledit garde des sceaux, et comme il est un peu violent, attaqua ledit garde des sceaux quy luy respondit plus hautement qu’il ne devoit. Trois jours apres, le roy (quy ce jour la avoit pris medecine) les fit tous deux venir en sa chambre ou nous estions peu de gens, et leur commanda de demeurer amis ; et sur ce que Mr d’Espernon se haussa encores un peu en parolles, le roy quy estoit assis, se leva contre Mr d’Espernon et le malmena : puis en suitte ayant dit qu’il vouloit aller a ses affaires, chascun sortit par la porte du cabinet, et Mr d’Espernon s’en alla par la porte de la chambre tout seul, et moy je le voulus aller accompagner nonobstant toute la brouillerie qu’il avoit eue avec le garde des sceaux et avec le roy. Il se trouva un peu estonné quand il se vit enfermé dans l’antichambre et eut quelque soubçon que l’on le vouloit arrester ; car toutes les portes estoint fermées. Je m’avisay de regarder sy le petit degré quy est contre la porte de la chambre du roy estoit point aussy fermé, et l’ayant trouvé ouvert j’y ammenay Mr d’Espernon de quy les gens l’attendoint en la salle haute et passames tous deux jusques devant le Louvre ou il trouva son carrosse quy l’emmena en son logis ou en quelque autre, me priant de luy envoyer donner avis sy on n’avoit rien resolu contre luy. Je parlay a Mr de Luynes sur son sujet, et me dit : « Il veut aller a Mets ; qu’il haste un peu son voyage et s’y en aille : car ces messieurs pourroint animer le roy contre luy. » Je vis bien qu’ils desiroint qu’il partit de la court et allay le lendemain trouver Mr d’Espernon et luy fis sçavoir l’intention du roy et du favorit. Il me pria de sçavoir sy, venant