nous y ont donné aucun tour ny atteinte, et nos trouppes quy sont veritablement aucunement[1] desperies, ne le sont point a l’esgard de celles de Ville Bourbon ou du Moustier, et nous reste encores cinq mille bons hommes de pié prests a employer ou il vous plaira nous commander. Ces messieurs quy commandent en ce quartier et quy soustiennent tout le faix du siege sur leurs espaules, ont tant de generosité et de gloire, qu’ils aymeroint mieux perir et mourir que de vous avoir proposé de le lever ; mais moy quy n’ay pas les mesmes interets qu’eux, a quy celuy du service du roy m’est cher a l’egal de ma vie, je ne marchanderay point a vous dire en ma conscience, et selon le serment que j’y ay, que vous devés, Monsieur, avesques un bon ordre, une entiere seureté, et en temps non precipité, quitter l’entreprise et le siege de Montauban et reserver le roy, vous, et cette armée, a une meilleure fortune et a une plus commode sayson. »
Comme un chascun vit clairement que mon avis estoit le seul que la sayson et l’estat de nos presentes affaires requeroint, personne n’y contredit, bien que aucun n’en voulut proposer autant, chascun estant bien ayse d’en laisser faire la proposition a un autre.
Je m’en retournay par Picacos avec monsieur le connestable quy me dit qu’il estoit resolu de lever le siege. Je luy dis : « Monsieur, vous faites bien de vous coucher de peur d’estre porté par terre. Je ne m’estonne pas que vous soyés contraint de lever un siege que vous avés entrepris sans dessein ; car vous ne
- ↑ Un peu.
