par la perte de ces deux personnages, et avoint jetté les yeux sur Mr Alligre[1], tres habile homme certes et digne de la charge ; mais il estoit sy lié avec eux, que Mr de Puisieux et la caballe de monsieur le chancelier le redoutoint. Mr de Puisieux m’employoit aupres du roy pour faire que l'on rendit les sceaux a monsieur son pere ; mais le roy dissuadé par ces messieurs sur le pretexte de son absence et de son grand aage, me commanda de luy dire[2] qu'il ne s'y devoit point attendre, ce que je fis ce jour mesme. Mais il[3] me pria aussy de remontrer au roy qu’il importoit au bien de son service que celuy a quy il donneroit les sceaux fut en bonne intelligence avec son pere ; que cela ne pourroit estre sy Mr Alligre les avoit, et qu’il le supplioit au nom de Dieu que celuy là a cette occasion en fut excepté, ce que le roy ne luy voulut jammais promettre, quelque instance que je luy en peusse faire, parce qu’il avoit inclination pour Mr Alligre, et qu’il y estoit porté par tout le petit coucher qu’il avoit gaigné pour luy, quy estoit ceux quy demeuroint aupres du roy apres qu’il avoit donné le bon soir au monde ; car il veilloit encores apres cela une heure ou deux. Tout ce que je peus faire fut de faire dilayer cinq ou six jours sa promotion.
Le dimanche 18me n’avança aucun travail ; car il arriva un tel orage (quy sont rares en ce païs là, mais
- ↑ Étienne d’Aligre, seigneur de la Rivière, fils de Raoul d’Aligre, seigneur de la Rivière, et de Jeanne Lambert, était alors conseiller du roi en ses conseils, et devint plus tard garde des sceaux, puis chancelier de France. Il mourut le 11 décembre 1635, à l’âge de soixante-seize ans.
- ↑ De dire à Puisieux.
- ↑ Il, Puisieux.
