amusement affin de retarder les desseins et les progres du roy ; que c’estoit aussy une gloire espagnole de ne vouloir pas souffrir que la paix, qu’asseurement ils desiroint autant que nous, se fit les armes du roy estans sorties de la France ; finalement qu'il estoit expedient pour le service du roy de faire ouvertement desclarer Mr de Savoye, lequel montroit par plusieurs signes de faire le neutre, et particulierement par celuy cy de se venir abboucher en un lieu quy estoit moytié a luy et moytié au roy, ce que monsieur le cardinal ne devoit permettre, et qu’il estoit d’avis qu’il devoit respondre a monsieur le prince qu’ayant encores des affaires pour huit jours a Lion, et son indisposition ne luy permettant pas d’aller jusques au Pont de Beauvoisin, s’il luy plaisoit [de prendre la peine][1] de venir a Lion, il y seroit receu comme il convenoit a un tel prince et beau frere du roy ; que s’il[2] ne pouvoit recevoir cet honneur de le voir là, qu’il l'iroit recevoir a Chambery en s’en allant en Italie, s’il luy plaisoit l'y attendre.
Mr le mareschal de la Force, pour ne contrarier a Mr de Chomberg, approuva son opinion, et Mr de Montmorency inconsiderement la confirma. Pour moy je la voulus contrarier ouvertement, et dis que, sy le roy et monsieur le cardinal quy avoit la souveraine puissance [de ses armées][3] sous luy, n’avoint quelque dessein caché (et quy fut connu seulement par Mr le mareschal de Chomberg quy estoit de son conseil estroit), quy ne
