Charlion , qui siet sor mer ,
Se faisoit li rois coroner,
A une cort qu’il ot mandée.
A un aost fu l’asamblée ;
Moult fu la cors, qu’Artus tint, grans ,
Et la cités bonne et vaillant.
Quant venus fu tos li barnés,
Qui a la cort fu asamblés ,
Grans fu la cors qui fu mandée,
Quant i fu la cors asamblée.
La véisiés grant joie faire ,
As jegléors vièles traire.
Harpes soner et estriver ,
As cantéors cançons canter.
Li cantéor metent lor cures
En dire bêles aventures.
Moult ot en la cort bieles gens ;
Mains chevaliers d’armes vaillans
Ot en la cort , je ne mène mie ,
Si com la letre dist la vie.
Li rois Aguillars i estoit ,
Cui li rois Artus moult amoit ;
Ses frères Los et Uriens.
Li rois Horels et Floriens ,
Bues de Gonefort et Tristans ,
Gervis de Cartre et Erians ;
