Je me veux conſerver, le repos dans mes Tentes
Rendra mes paßions tranquilles & contentes.
Je les verray perir mes laſches, mes ingras,
Et me vangeray d’eux en ne les vangeant pas.
Mais tu pardonnerois, ſi tu me voulois croire,
À cette ingratitude, à cauſe de ta gloire.
Exerce pour ton bien ce bras ſi valeureux,
Fais pour toy (cher Amy) ce que tu fis pour eux :
Quoy tu veux eſtre oyſif au ſiege d’une ville ?
Parce qu’ils ſont ingrats, tu ceſſes d’eſtre Achille ?
Tu te prives d’honneur ? non non qu’ils ſoient ingras,
Qu’ils ne t’eſcoutent point, qu’ils pechent, & combas,
Que des fleuves de ſang rougiſſent la campagne,
Va (genereux Achille) & qu’Ajax t’accompagne.
J’eſpargne icy mon ſang, va prodiguer le tien,
Ton bras pour triompher n’a que faire du mien.
Si tous les autres chefs laſches, & plains de vices
Devenoient des Ajaxs, devenoient des Ulyſſes,
Que chacun euſt en ſoy la force de vos bras,
Je m’en vangerois mal en ne combattant pas.
Si je combas ſans vous, ma foibleſſe eſt extreſme,
Et les plus valeureux ſans doute en ſont de meſme,
