Cette page n’a pas encore été corrigée
Mençonge, pour péur de mort :
Vous l’achateriez trop fort. »
Il li dient : « Fei ten pleisir ;
Nous ne t’oserians mentir. »
Joseph dist : « Se vous me voulez
Croire, pas ci ne demourrez ;
Ainçois leirez vos héritages,
Vos terres et vos hesbergages,
Et en eissil nous en iruns :
Tout ce pour amour Dieu feruns. »
Il dient ce ferunt-il bien.
Joseph va à Vaspasyen,
Si li pria qu’à cele gent
Pardonnast tout sen mautalent,
Pour amour de lui le féist ;
Vaspasyens ainsi le fist.
Vaspasyens ainsi venja
La mort Jhesu, qu’il mout ama.
Quant Joseph eut si esploitié,
A Vaspasyen prist congié
Et d’ileques se departi ;
Ses genz mena aveques li,
En lointeinnes terres alerent
Et là longuement demourerent.
