Cette page n’a pas encore été corrigée
Meis, se le povoir en avoie,
Sachiez de voir je le feroie,
C’une femme en men povoir ei
Ki fera quanque je vourrei. »
Li autre dient : « Nous avuns
Cilec un de nos compeignuns
Qui fourme d’omme puet avoir
Et femme de lui concevoir ;
Meis il couvient que il se feigne
Et que couvertement la preigne.
Ainsi dient qu’engenrerunt
Un homme en femme et nourrirunt,
Qui aveques les gens sera
Et ce que feront nous dira. »
Meis mout est fous li Ennemis,
Qui croit que Diex soit entrepris
Que il ceste uuevre ne séust
Et qu’il ne s’en apercéust.
Ainsi prist Ennemis à feire
Homme de sens et de memoire,
Pour Dieu nostre pere engignier
Et forbeter et conchier :
Par ce poüns-nous tout savoir
Que Ennemis est fous de voir.
