Cette page n’a pas encore été corrigée
Que ces trois persones sunt une
Et persone entiere est chaucune. »
Joseph, qui à genouz estoit,
Prist le veissel que Diex tenoit.
« Joseph, dist Diex, as pecheeurs
Est sauvemenz pour leur labeurs.
Qui en moi vraiement croirunt,
De leur maus repentance arunt.
Tu-méismes, pour tes soudées,
Has mout de joies conquestées ;
Saches que jameis sacremenz
Feiz n’iert, que ramembremenz
De toi n’i soit. Tout ce verra
Qui bien garder y savera. »
-- « Par foi ! dist Joseph, je n’ou sai ;
Dites-le-moi, si le sarai. »
-- « Joseph, bien sez que chiés Symon
Menjei et tout mi compeignon,
A la Cene, le juesdi ;
Le pein, le vin y benéi,
Et leur dis que ma char menjoient
Ou pein, ou vin mon sanc buvoient :
Ausi sera représentée
Cele taule en meinte contrée.
