De quibus premissis omnibus et singulis prefatus promotor petiit per nos, notarios et scribas predictos, sibi fieri et confici unum et plura publica instrumenta. Presentibus nobilibus viris, domino Roberto d’Espinay, milite, Yvone de Rocerff, magistro Roberte de Ripparia, supradictis, Petro Juete, Johanne de Vennes, ac aliis in multitudine copiosa testibus ad premissa vocatis specialiter et rogatis.
Qua hora secunda post meridiem predicte diei veneris adveniente, prefati domini episcopus et vicarius inquisitoris sepedicti personaliter se representarunt in aula inferiori predicta et, instante dicto promotore, tunc etiam personaliter ibidem comparente, ipsi domini episcopus et vicarius, vigore commissionis predicte, dominos episcopum Briocensem et presidentem supradictos ad dictum Egidium de Rays, reum, in quadam alta camera predicte Turris nove Nannetensis eidem Egidio, reo, pro habitacione sua tunc temporis deputata, in qua ipse reus ex tunc dicebatur existere, destinarunt, una cum Johanne Parvi, altero nostrum quatuor notariorum et scribarum predictorum, ut ipsi audirent et refferrent ea que idem reus fateretur, si que forent, de sibi objectis, ut prefertur. Qui quidem domini commissarii ad dictum reum accesserunt et postmodum, eadem die, ad dictam aulam inferiorem reversi, dixerunt et retulerunt prefatis dominis episcopo Nannetensi et vicario prelibato se dictum reum allocutos fuisse ipsumque reum, in eorum presenciis et coram eis, quamplura confessum fuisse et esse, ut in relacione desuper confecta sub infrascripto tenore lacius continetur, quam tum exhibuerunt hujusmodi sub tenore.
Sequitur quedam extrajudicialis confessio sepedicti Egidii de Rays, rei, in predictorum dominorum episcopi Briocensis, ad hoc per prefatos dominos episcopum et vicarium quoad ea que juridictionem concernunt ecclesiasticam, ut premittitur, deputati, et magistri Petri de Hospitali, presidentis, Johannis Labbé, Yvonis de Roscerff, scutiferi, et Johannis Toucheronde, clerici, ac mei, Johannis Parvi,
