demourant a Angers, en soy conplaignant, disante qu’elle ne savoit qu’il estoit devenu.
Et aussi en virent fere demande et complainte a Trephaine[1], femme Eonnet Le Cherpentier, boucher, seour de la mere dudit enffant, laquelle pareillement l’a ainsi dit et relaté.
Item, enquis s’ilz ont point oy dire et tenir que ledit sire de Rays pranseist ne feist prendre et occire celui enffant ne autres, dient que non, sinon depuis que la prinse dudit sire de Rays et de ses gens a esté fete ; et n’avoir eu congnoessance desdites Stephanie et Perrone, a present detenues en prinson, jusques au temps de present.
De VIIIe jour d’octobre.
Jehan Chiquet, parcheminier, demourant hors la porte Sauvetout, deppose, par son serment, que, ung mois a ou environ, ung nommé Macé Drouet, mercier, de la partie de Chantelou[2], pres Rennes, vins loger chies ce tesmoign et en sa compaignie plusieurs autres merciers. Et parloint ensemble des enffants qui avoint esté perduz ou pais de Rays, auquel Drouet ce tesmoin oyt dire que deux autres merciers et lui avoint esté ou pais de Rays a plusieurs faires, environ ung an derrein, et que, depuis qu’il les avoit lessés en icelui pais de Rays, il ne les avoit veuz et qu’il avoit veu leux pere et mere qui lui avoint demandé des nouvelles, et qu’il leur avoit dit qu’il ne savoit qu’ilz estoint devenuz.
Pierre Badieu, mercier de ladite parroaesse de Chantelou, dit que, ung an a ou environ, il vit, oudit pais de Rais, deux petiz enffans de l’aage de neuff ans ou environ, et avoint chacun sa bale et alloint es faires ainsi que ce tesmoin le faisoit, et estoint freres enffants de Robin Pavot dudit lieu. Et oncques puis celui temps ne les vit, ne ne sceit qu’ilz sont devenuz, et que depuis il a esté ou pais d’ou ilz
