our plus facillement paruenir a la haulteſſe dhonneur,
c’eſt choſe moult conuenable a toute perſonne qui
du precieulx don de ſapience deſire faire ſon
treſor & ſa richeſſe, de reduire ſouuent a ſa memoire
les faiz des precedans hommes notables qui ont
dit ou fait choſes dignes de recordacion &
icelles bien retenir : car en ce faiſant & en
liſant les hiſtoires qui eſcriptes en ont eſté,
nous pouons veoir a quelle fin les vngs & les
aultres par bien ou mal faire ſont paruenuz.
Et dit a ce propos le glorieux amy de Dieu
Monſieur ſainct Gregoire au premier chapitre
du deuxieſme liure de ſes moralles : Ainſi que
en regardant en vng mirouer nous voyons toutes
les choſes qui y ſont preſentees & qui le mirouer
peuent regarder ſoit bonnes ou mauuaiſes,
belles ou laides, petites ou grandes, auſſi eſt il
que en liſant les croniques & hiſtoires, les faiz
& ouurages qui y ſont redigez nous ſemblent
eſtre preſens & deuant noz yeulx. Et dit notamment
que lon doit retenir a memoire les choſes
deſſuſdictes ſans les mettre en oubly : car,
comme recite Marcus Varro, les oreilles de
ceulx qui ne retiennent ce que on leur recite,
reſemblent a vng tuyau ou goutiere par qui
paſſe leaue inceſſamment ſans y faire reſidence.
De telz gens faict mencion leuuangille de ſainct Luc au huitieſme chapitre qui dit que la ſemence qui tumbe ſur la pierre deuient aride & ſeiche ſans porter fruict. Tout ainſi eſt il de pluſieurs perſonnes qui ioieuſement eſcoutent & entendent les bonnes & vertueuſes parolles, mais elles ny peuvent prendre racine ne augmentacion pour faulte dicelles retenir a memoire par ferme credence & perſeuerance. Salomon a qui Dieu ottroia telle requeſte quil vouldroit demander, ne demanda point richeſſes terriennes, beaulx enfans, belle femme, longue vie, ſante ne aultres mondaines felicitez, mais ſeullement requiſt le don de ſapience, congnoiſſant que luy qui eſtoit roy pourroit par celuy don regner, dominer & ſeigneurier, ſon royaulme eſlever & entretenir, & ſelon les ſainctes & treſſacrees loix clerement congnoiſtre & iuſtement iuger : auſſi que par iceluy don lhomme eſt faict prochain amy de Dieu, pour eſtre conduit au royaulme eternel qui eſt la fin a laquelle il a eſte faict. Toutes ces choſes nous peuent inciter & donner courage a aymer vertu & fuyr & abhorrer vices, pour craindre & euiter oprobres & reproches, pour auoir bon nom qui dure a iames. Or, eſt il que en liſant & examinant pluſieurs cronicques & hiſtoires ou iay par aucun temps voulu vacquer pour euiter ocioſite qui eſt marratre de vertu, apres auoir vacque a leſtude de ma vocation en les temps & ſaiſons