Le considerer, tres merite chevalier, que le fruict de lire les histoires (par le tesmoignage de Flavius Albinus) est acquerir une desireuse emulacion d’honneur et ung vouloir de suyvir et ressembler en meurs et gestes ceulx desquelz on oyt bien dire, et que la congnoissance des choses gerées excite les humains courages, à prudence, magnanimité, droicture, modestie et aultres vertuz tendans à souveraine felicité et esloigner du contraire ; pour laquelle consideracion les anciens regardans à l’utilité du commun bien, pour n’estre d’ingratitude repris, mais les bien faisans remunerer et donner occasion aux vivans de ainsi faire, tenoient en leurs temples et lieux publicques, leurs statues, portraictz et ymages richement entaillez et enlevez ; et que necessaire seroit pour la reviviscence de discipline militaire, par nonchalance semymorte, la florissant gendarmerie de France ressembler en vouloir,
