en ſont feſtin à leurs amis, & ne le mangẽt quaſi iamais en leur particulier. Dans leurs mariages il y a cecy de remarquable, qu’ils ne ſe marient iamais dans la parenté en quelque degré que ce ſoit ou direct, ou collateral, mais font touſiours de nouuelles alliances, ce qui n’eſt pas vn petit auantage pour maintenir l’amitié. Dauantage en cette fréquentatiõ ſi ordinaire, comme ils ont la plus part l’eſprit aſſez bon, ils s’eueillent & ſe façonnent merueilleuſement ; de ſorte qu’il n’y en a quaſi point qui ne ſoit capable d’entretien, & ne raiſonne fort bien, & en bons termes, ſur les choſes dont il a la cognoiſſance : ce qui les forme encor dans le diſcours ſont les conſeils qui ſe tiennent quaſi tous les iours dans les Villages en toutes occurrences : & quoy que les anciens y tiennent le haut bout, & que ce ſoit de leur iugement que dépende la deciſion des affaires ; neantmoins s’y trouue qui veut, & chacun a droit d’y dire ſon aduis. Adioutez meſme que l’honneſteté, la courtoiſie & la ciuilité, qui eſt comme la fleur & l’aggréement de la conuerſation ordinaire & humaine, ne laiſſe pas encor de ſe remarquer parmy ces Peuples ; ils
