les bons enſeignements qu’il auoit eu autrefois de nos Peres en France, & ſe remettre parfaictement dans le train de la vertue & pieté Chreſtienne. Nous approuuions fort ce deſſein, veu meſmement qu’il euſt mené auec luy quelque ieune homme de ſes parens, qui euſt pû eſtre inſtruit & baptiſé là bas : mais quelque difficulté ayant trauerſé ceſte reſolution, il ſe delibera de paſſer vne bonne partie de l’Hyuer auec nous, ce qu’il a fait auec beaucoup de contentement & de profit, tãt de ſon coſté que du noſtre ; car il s’eſt remis dans la hantiſe des Sacremens, & dans l’vſage de la priere. A Noël il fit vne fort bonne Confeſſion generale depuis ſon Bapteſme : d’autre part en nos Catechiſmes & inſtructions que nous faiſions aux Sauuages il nous ſeruoit de Truchement, & nous a traduit pluſieurs choſes en langue Huronne, où nous admirions la facilité qu’il auoit à entendre noſtre langue & à comprendre & expliquer les myſteres les plus difficiles. Bref il teſmoigne que veritablement il a la crainte de Dieu.
Pour concluſion de ce chapitre nous eſperons vous renuoyer les Peres Antoine Daniel, & Ambroiſe Dauot auec vne bande de braues petits Hurons, afin de donner
