tiſay cet Automne au village de Scanonaenrat, en retournant de la maiſon de Louys de ſaincte Foy, où nous eſtions allez inſtruire ſes parens. La ſurdité de ceſte malade, & la profondeur des myſteres que ie luy propoſois, faiſoit qu’elle ne m’entendoit pas ſuffiſamment, ioinct que l’accent de ceſte Nation, vn peu different de celuy des Ours où nous ſommes, meſme mon ignorance en la langue, accroiſſoient la difficulté, & me rendoient moins intelligible. Mais Noſtre Seigneur qui vouloit ſauver ceſte ame, nous pourueut incontinent d’vn ieune home, lequel nous ſeruit de truchement. Il s’eſtoit trouué auec nous en la Cabane de Louys, & nous auoit ouy diſcourir de nos myſteres, de ſorte qu’il en poſſedoit deſia vne bonne partie, & conceuoit fort bien ce que ie luy diſois. On dit que ceſte femme qui fut nommée Marie, dans ſes plus grandes faibleſſes, predit qu’elle ne mourroit de huit iours ; ce qui arriua.
Ils ne recherchent preſque le Bapteſme que pour la ſanté. Nous taſchons de purifier ceſte intention, & les diſpoſer à reveuoir également de la main de Dieu la maladie & la ſanté, la mort & la vie, & leurs enſeignons que les eaux viuifiantes du S.
