Et traient lor espées li vallant chevalier,
Que sont andui au caple li bon baron prisié.
Ja i auera dolor, se Dex n’en prent pitié.
Oies de lor cevas com il ont esploitié :
Quant voient lor segnor ensi for[t] gramoier,[1]
Li uns cort sore l’autre com soient esragié ;
Il se mordent as dens et s’esgratent as piés.
Autresi se conbatent comme dui chevalier.
Quant li Danois le voit, à poi n’est enragiés ;
De Broiefort dota, car Baiart fu plus fiers.
Il a traite Cortain k’il li voloit aidier ;
Vers Baiart est venus, durement aïriés
Et Renaus li escrie : « Que vels tu faire, Ogier ?
Laisse le[s] .ii. cevax ensamble esbanoier.
Se vos voles bataille, à moi le commencies. »[2]
Il a traite Froberge dont li pons fu d’ormier,
Et vait ferir Ogier en son hiaume vergié
Que les flors et les piere[s] en a jus trebucié[3]
Et .c.l. malles de son hauberc doblier ;[4]
De la car de la hance li a .i. poi trencié ;
Se li brans ne tornast el poing au chevalier,
Jamais li bons Danois n’eüst à hom mestier.
Tot contreval le hance est li brans glaçoiés,
Les esporons à or li a andeus tranciés ;
Jusqu’à heut est li brans en la terre ficiés ;
Et Renaus li escrie : « Deça vos ai toucié ;
Vo hauberc et vo haume vos ai bien enpirié.
Plus aves la car blance que nois sor le ramier.[5]
C’est costume as Danois, car sovent sunt baignié. »
Qant Ogiers l’a veü, prist soi à enragier
Et tint traite Cortaine, le brant trenchant d’acier.
« Ahi ! Cortain, fait il, molt vos oï prisier ;
En tante f[i]ere coite m’aves eü mestier,[6]
Page:Castets - La Chanson des quatre fils Aymon, 1909.djvu/543
Le texte de cette page a été corrigé et est conforme au fac-similé.
515
les quatre fils aymon
