Page:Castets - La Chanson des quatre fils Aymon, 1909.djvu/1005

977

appendice

« Dame, chen dist Renaus, ne sai que nous feron.
Mellez sommez à Kalle, ja ne vous cheleron.
Sans congié departismez de la court entre nous,
75Quer li dus Buef, mon oncle, le sire d’Aigremont,
Si a ochis Lohier qui estoit fix Kallon. »
Quant la dame l’oï, si en ot marison ;
Bien set de verité, c’est lor destruction.
La dame Marguerie s’ala moult dolosant
80Qu’elle doute la guerre et le destruiement.
« Biau fix, chen dist la dame, .i. petitet m’entent.
Sus toute creature va ton seignor servant.
Et vous, sire dus Aymez, moult me vois merveillant
Que de Kallon partistes si airéement. »
85Et respont li dus Aymez qui le cuer ot dolent,
Que « le duc d’Aigremont, mon frere le vaillant,
A mort le fix Kallon à son acherin brant. »
« Sire, chen dist la dame, pour Dieu omnipotent,
Ne te va de lor fet pour rien entremetant ;
90Mes aidiez à Kallon, mon seignor le vaillant,
Mes aidiez à Kallon ton seignor, loialment. »
Et respont li dus Aymez : « Si m’aït .S. Amant,
Or soit comme il pourra, des ichi en avant. »
Or diron de Kallon qui son duel va menant
95Pour la doulor qu’il ot de Lohier son enfant.
Encor ne [s]avoit Kalles ne n’iert aperchevant
Que Aymon et ses fix fussent de court partant.
Moult par fu grant le duel à Paris la chité
Et d’ommez, et de famez et de princhez chasé.
100Par le conseil dus Naymez, le viel canu barbé,
L’ont il en fosse mis et l’i ont enterré,
Et en apres en sunt ariere retourné.
Mes .i. mesage[s] a Kallemaine encontré
Qui l’afere li a tout mot à mot conté
105Que li dus Aymez est à Dordonne [tourné].
Quant le roi l’entendi, si a le chief croullé.
L’emperere de France forment se couroucha
Pour chen [que] dus Aimon de la court s’en ala.
Lors a maudite l’eure que Renaut adouba ;
110Ichen sachiez de voir que moult petit menja.
Moult par fu grant le peuple que on i assembla.
Moult fu grande la court en la sale pavée.
Tant chevalier i ot venu à l’assemblée.
Kalles les aresonne à la barbe mellée.