A Paris s’en revint toz plains de marison.
Girars s’en est partiz, li dus de Roseillon,
Et Doo de Nantueil o le flori grenon :
Ainc ne pristrent congié, ce savons, a Karlon.
Karles apelle Aymon, si l’a mis a reson.
La jura li duz Aymes desor sainz a bandon,
Et forjura ses filz desor .S. Simeon :
Ja mes n’auront del sien vaillant .I. esperon
Ne nes recetera a recet n’a donjon.
Adont s’est departiz de la cort duz Aymon
Et s’en vint a Dordon a coite d’esperon ;
La trova il sa fame et ses filz a bandon,
Atant les en chaça, n’i fist arestison,
Mes eincoiz lor dona del sien a grant fuison.
De Dordon departirent li .IIII. fil Aimon,
Jusques aus prez d’Ardane n’i font arestison.
La firent .I. chastel qui Montesor ot non.
Si coiement le firent c’onques ne le sot on.
Car forment redotoient l’empereor Karlon.
Li rois fu a Paris en son mestre donjon,
A ses barons se claime des .IIII. filz Aymon.
Moult demora lonc tens apres ce, ce savon,
Que n’en oï novelles li rois de Monloon,
Forz que a unes Pasques que li dit .I. garçon
Que la sont ostelé si anemi felon.
Come li rois l’oï, Deu loa et son non.
Il en avoit juré sa barbe et son grenon
Que il ira sor els a coite d’esperon.
Dont fist mander son ost entor et environ,
N’i lessa a semondre escuier ne jeldon.
Des genz que il amaine, n’est se mervelle non.
Bien furent .C. milier, tant esmer les puet on.
Karles parti de France o le nori grenon ;
L’oriflambe bailla Galeran de Buillon,
Dont errent et chevauchent li chevalier baron.
Tant a alé li rois que vint à Monloon.
[O]iez, seignor baron, que Dex vos puist aidier,
Li glorioz dou ciel qui tot a a jugier ;
S’orez bone chançon qui moult fet a prisier.
Page:Castets - La Chanson des quatre fils Aymon, 1909.djvu/161
Cette page a été validée par deux contributeurs.
149
les quatre fils aymon
