Ne me faitez pas honte ne Ogier le membré,
Estout le fil Œudon ne Turpin l’ordené,
Car vous averiez tost le bien a mal tourné.
[Nous sauverons Renaut qui l’avons amené.
Ne sai ore, dist Karllez, com vous li aideres.
Et Ogiers et dus Naymes s’en issirent des trez
Et ont dit a Karllon, oiant tout le barné :
Nous vous rendrons l’ommage que vous avons porté.
A ichele parole sont arriere tourné,
Et ont oï lez contez qui se sont escrié,
Rollant et Olivier qui ont Renaut trouvé.
Quant Ogiers l’entendi, a poi n’est forsenez.
Ahi, Naymes, [fait] il, Renaut traï m’avez.
Lors s’en tourne poignant envers l’arbre ramé.
Olivier de Viane a Renaut apelé,
Rollant et Olivier qui ont Renaut trouvé ;
Si forment l’ont souspris que il ne pot monter.
Traï m’avez, Estout ! che dist Renaus li ber.
Sire, che dist Estous, vous ditez verité,
Mais ja ne vous faurrai tant com puisse durer.
Olivier, dist Renaus, or vous doit ramembrer
Du grant don que vous fis desous Dordonne es prés,
Quant m’alastez gaitier a .ii. c. ferarmez
Et Maugis vous avoit du cheval craventé,
Quant je issi la hors a .iiii. m. armez.
Vo cheval vous rendi quant vous fis remonter,
Et vous rendi vo perte volontiers et de gré.
Sire, dist Oliviers, par le foi que doi Dé,
Je sui moult tres dolans que chi vous ai trouvé,
Mais il n’a si fier homme en la crestienté
Se il mal vous faisoit, ne m’en deüst peser.
Atant es vous Rollant qui li a escrié :
Renaus, li fiex Aimon, or aves trop alé.
Par mon chief, dist Ogiers, vous ne le toucheres.]
Laissies ester Renaut, vous ne le toucheres.
Entre moi et duc Nayme l’avons chi amené.
importantes. Au v. 24, par Dordonne, il faut entendre la rivière. L’Arsenal donne « Balençon es gues » qui paraît la vraie leçon.
