D’une cote de gris s’est la appareilliés,
L’escherpe et le bourdon aveuc lui a coubrés ;
Il ot fait proveance, il ot .ii. jours passés.
Maugis li donna l’erbe jadis dont s’est frotez.
Lors se seignia Regnault, a Dieu s’est commandez.
En un cellier entra qui parfont fu cavés,
La ot un huis de fer, par lui fu deffermés.
Regnault ala en bas qui bien sot les agés,
Par la yssi Regnault dedens les bois ramés,
Tout nus piés et en langes s’estoit acheminés ;
Or le conduie Dieu par sa sainte pités,
Car nul tel pelerin depuis ne fu trouvés.
Mais Regnault en alant c’est ileuc pourpensés
Qu’il se retourneroit, lors ne c’est detirés
Pour savoir se de nulx il seroit ravisés.
Lors revient a Tremongnie ou pour Dieu fu soupés,
Couchiés et repeüs sans estre araisonnés,
Oncques n’y fu connut d’omme de mere nés.
Or diray de Karlon qui estoit repairés.
Par la main tient la damme et Naymon fu bien pres.
La sont venu ensemble li prince naturez.
Adont parmy la sale a le roy regardés.
Il demande Regnault et ou il est alés,
Mais nul ne le savoit. Adont fust aïrés
Le roy Karle de France et fu mont trespensés.
Quant li baron oïrent le roi au fier talent
Qu’il demande Regnault si especïalment,
Es chambres et en sales le quierent longuement.
Alard découvre les vêtements que Renaud a laissés dans sa chambre. Il comprend tout, pousse un grand cri et tombe évanoui. Charles et les barons accourent, le roi redresse Alard qui s’écrie.
Ay ! Karle, bons rois, Regnault point ne vous ment.
Il va ou grant voiage certes mont povrement.
Quant le roy voit les dras, si ploura tendrement
Et trestous les barons avironnéement.
A ! Regnault, dist le roy, or say a essient,
De toi n’a plus preudomme en tout le firmament.
