Et qu’il veult estre hermite par penanche adrechie,
Quant li hermites l’ot, tous li sans li fermie ;
A lui meïsmes dist : Doulce Virge Marie,
Gardez moi que ce lerre si endroit ne m’ochie.
Ne [set] comment il fasse, puis dist a vois serie :
Biaus sire, ales par ci, a senestre partie,
Et illuec (quez) trouverez vous une hermiterie,
Et les draps du preudomme qui hier finna sa vie.
Et Maugis aperchut bien que cil se defye.
Il dist : Sire, je vois, se Ihesu le m’otrie.
Atant s’en est partis, qu’il n’y a fait detrie.
Bien vit que li hermites bien assur n’estoit mie.
Tant fist qu’il a le lieu trouvé en la partie
Et l’abit du preudomme que la mort ot mengie.
Un ruicelet y ot dont Maugis Dieu gracie.
La mengoit les racines et menoit sainte vie.
Et plouroit pour Regnault le jour et l’anuitie.
Encement fu Maugis par dedens l’ermitage.
Un an tout acompli prent droit la son mesnage.
A mains de .iiii. lieues y avoit maint vilage.
La gent ens ou Caresme par droite propre usage
Y venoient souvent pour li faire avantage,
Confesser a l’ermite qui fu de viel eage
Et ilec li portoient du pain et du potage.
A Maugis ennoya quant il vit tel usaige,
Ne vouloit point mengier ne mes que rachinage.
Pour itant se partist et laissa l’ermitage.
Ens ou bois s’en ala ou parfont du rammage ;
La entra si avant pour faire son mesnage
Que desous une roche qui fu et grant et large
Fist son habitement a loy d’omme sauvage.
La ne passe nullui fors larrons du bocage,
Mais depuis s’en parti et laissa l’ermitage.
Or lairay de Maugis qui au bois demoura,
S[i] dirai du roy Karle qui France governa,
Qui estoit departis de Tremongnie de la.
Naymon y ot lessié qui la terre garda.
Les trois freres s’en vont en Gascongnie de la,
Les deux enfans Regnault aveuc eulx on mena.
Page:Castets - La Chanson des quatre fils Aymon, 1909.djvu/219
Cette page a été validée par deux contributeurs.
207
les quatre fils aymon
