Lors a li dus s’ensaigne hautement escrié ;
Atant es vos Girart et Aymon l’aduré.
Li dus Bues d’Aigrement ne s’a aseüré,[1]
Il broche le destrier, s’a l’escu acolé,
Et Richars li Normans s’est contre lui alés.
Ambedui s’entrevienent par vive poesté ;
Les lances furent roides, li espié amoré[2]
Et li cheval sunt bien endui entrencontré,
Et li vasal sunt fier et de grande bonté.
Sor les escus à or se sunt grant cos doné,
Que des ais et del cuir i a petit duré.
Li hauberc furent fort, quant il ne sunt fausé ;
Si forment s’entrehurtent li vasal aduré,
Li arçon sunt rompu et li poitral quassé ;[3]
Des hiaumes se hurterent, si se sunt estoné ;
A poi que de lor chies ne sunt li oeil volé.
Par enson les chevaus qui furent sejorné,
Se sunt li dui vasal abatu ens el pré ;
Por .i. seul petitet qu’il ne sunt afronté.[4]
Molt bien poïst on estre demie liue alé,
Ençois que li baron se fussent relevé.
De la grant envaïe furent tot estoné.
Dans Richars li Normens est primes remonté
Et dus Bues d’Aigremont n’i a point demoré ;
Par droite vive force a son cheval coubré.
Ja i aura dolor, se Dex n’en a pité ;
Atant vint l’empereres, s’a Monjoie ! escrié :
« Ahi ! Bues d’Aigremont, où iestes vos alé ?
Malvais cuivers, traïtres, com m’aves malmené !
Mon fil m’aves ocis dont j’ai le cuer iré. »
Li dus ne l’oï mie, d’autre part est torné,
Et Charles laise corre le destrier abrivé ;
Si ala ferir Coine en son escu listé.[5]
Icil fu nies Girart et de sa seror né ;
Page:Castets - La Chanson des quatre fils Aymon, 1909.djvu/324
Apparence
Cette page a été validée par deux contributeurs.
312
les quatre fils aymon