Trop m’est preis arestés, il le comperra chier.
Ja, se Deu plaist, la roce ne li aura mestier ;
Car nos l’afamerons ençois .i. an entier,
Si qu’il n’auront laiens à boivre n’à mengier. »
« Sire, dist li dus Naimes, miex poes esploitier.[1]
- ↑ 2188 B C placent cette proposition dans la bouche d’Aymes. C’est dès lors lui qui avec Ogier va demander à Renaud de rendre Guichard à Charlemagne. L’antagonisme du père et des enfants est donc posé dès le commencement de l’épisode des Ardennes. Est-ce invention propre à cette version ? Est-ce un reste d’une forme plus ancienne du récit ? Je pencherais pour la seconde solution.
Je reprends en entier la forme particulière à B C ; elle se sépare de la rédaction L au vers 2172 où est mentionnée l’escarboucle.
..........qui valoit maint denier.
Renaus, quant il le vit, sel prist à convoitier.
Il jure dame Diu qui tout a à jugier,
Que à petit de terme l’ira il calengier,
Se Dix li veut sauver son bon courant destrier.
Chertes, se il le dist, bien le puis avoier.
Karlles fu à son tref qui le corage ot fier,
Si apela Aimon qui moult fist à prisier.
Aimes, chou dist li roys, com porrons esploitier ?
Sire, chou a dit Aimes, bien vous sai conseillier.
Car prendes, s’il vous plaist, un sage messagier,
S’envoies à Renaut vo parole nonchier
Qu’il vous rende Guichart, son frere qu’il a chier,
Et amender le fache Renaus au cors legier
De Bertelot (sic) qu’il tua au ju de l’eschekier.
Puis si faites Guichart ou ardoir ou noier
Ou morir de tel mort que vostre plaisir iert.
Pour itant se porra de la guerre apaier.
Ales y, fait li roys, entre vous et Ogier.
Et chil y sont alé sans nesun delaier.
Se Dix ne les sekeurt qui tout a à baillier,
Jamais ne les verra l’emperere au vis fier.
Desoremais commenche canchons à enforchier
Que nus hons n’oï mais del tans le roy Lohier,
Mais jou n’ai soing de plus la canchon enforchier.
El castel sont entré par la porte Gautier
Et trouverent Renaut el grant palais plenier.
Ains de lui saluer n’ont soing de traveillier.
Aimes l’a apelé qui le corage ot fier :
Renaus, biax tres dous fix, fai la guerre laissier.
Bien ses que mes fiex es, de ma franche moullier,
Bien deveroïe d’ire et de duel esragier
