Par devant Charlemaigne chaï mors enversés.
Quant le voit l’empereres, forment en fu irés.
Et [Charles lor escrie : « Baron, c’or le prenes. »
Mais][1] Renaus lor ganchist, si s’en est desevrés.[2]
Apres ses compaignons s’en va tos abrivés,
Et Charles les enchauce et ses riches barnés.
.xiiii. liues longhes les a ensi menés,
K’il n’i ot jostes faites ne chevaliers tornés
Ne Renaus ne perdi .ii. deniers moneés,
Et vindrent à une aigue, si passèrent as gués,
Dusqu’Espaus en Ardane ne se sunt arestés.
L’empereres le voit, s’est arriere tornés ;
Il a dit à ses homes : « Suï l’avons asses.
Baron, laisies l’enchaus, nos destriers voi lassés.
Ja estera Renaus en Ardenois entrés ;
Nos nel baillerons mais en trestos nos aés.
A .c. mile dïables[3] soit ses cors commendés.
Deles ceste riviere anuit vos osteles.
L’erbe[4] est et bele et clere et larges est li prés.
Vos i poes bien tendre et paveillons et trés.
Li cheval paistront l’erbe que ci aval vees. »
Et cil [li respondirent][5] : « Si soit com vos voles. »
L’empereres descent ki fu grains et irés ;
A l’estrier fu Ogiers et Namles li barbés.
Le tref Charlon tendirent Guinemens et Guivrés,
Et paveillons et loges i veïssies asses ;
Et firent les feus faire, chascuns fu embrasés.
Li mangiers Charlemaigne fu pres et conreés ;
Molt fu bien herbergiés, et Renaus est passés.
La merci Deu de gloire, del roi [est][6] eschapés.
Charles, nostre empereres, pense de herbergier,
Et Renaus passe l’eve, il et si chevalier.
Molt se fist cointement cel jor, eschargaitier ;
