Se il ne vos pesoit, je dirai mes pensés.
Nos somes tant soupris des grandes povretés
Que jamais en cest sens ne serons recovrés ;
Mais faites mon conseil, se il vos est loés.
Alons ent à Dordone ki est bone cités,
Et passons Balençon et Biaucaire dalés.[1]
Si verrons nostre mere qui por nos a ploré.
Je vos plevis tres bien les moies loiautés,
Se secors nos puet faire, ja ne vos iert veés.
Bien a passé .vii. ans que nos a desirrés ;
Molt devrïens de li avoir grant pïetés. »
« Frere, ce dist Renaus, molt bien parlé aves.
Au chemin nos metons, quant il iert avesprés. »
Quant li autre l’entendent, ses en ont merciés.
Ce fu el mois de Mai qu’est entrés li estés,
Que li oiseillons chantent el parfont bos ramés
Et foillissent cil bos et verdoient cil prés ;
Chaitif en autre terre sont forment trespensé
Et au main et au soir sunt sovent dementé.[2]
Por les fius Aymon fu cist reprovier trové,[3]
Qui issirent d’Ardane où il ont conversé.
Molt furent de lor cors laidi et malmené.
Il oirent tote nuit, qu’il ne sunt aresté,
Et au matin s’enbunchent qu’il ne soient trové.
Il ont tant par les nuis, esploitié et erré
Que molt sunt aprochié de là où furent né.
De Dordone ont veü le palais honoré,
Les murs d’araine bis et le bos et le pré
Et la bele richoise de coi il sunt jeté ;
Membre lor des mesaises qu’il orent enduré ;
- ↑ 3301 Si fantaisiste que soit la géographie des trouvères, on note que le chemin indiqué (Valence, Beaucaire) mène par l’Est à la rivière de Dordogne, que l’on a ainsi non seulement l’origine de la cité imaginaire de Dordone, mais la région où se déroule l’épopée historique de Gondovald. Si, avec l’épisode des Ardennes, commence la contamination de la légende mérovingienne et de la légende carolingienne, on remarque que, pour la région méridionale, des traces d’éléments de date plus ancienne émergent toujours du récit.
- ↑ 3313-3314 M dementé Et au soir et au main durement gramenté.
- ↑ 3315 A ciz repairier.
