Jes envoiai en France, à Paris cortoier ;
Charles en ot grant joie, tot furent chevalier.
Li rois ot .i. neveu que merveilles ot chier ;
Quant il vit les dansiaus alever et prisier,
Cremi que desor lui volsissent souhaucier ;
O le jeu des esches les cuida engingnier.
Mais li valet nel porent sofrir ne otroier ;
La teste li briserent sus el palais plenier ;
Desi qu’il l’orent mort, ne le volrent laisier.
Lors s’en fuï chascuns sor le corant destrier ;
Awec eus en alerent bien .vii.c. chevalier.
Deseur Muese, en Ardane, en .i. grant pui plenier,
Fermerent .i. chastel par deseur le rochier.
Charles les fist de France deserter et chacier.
Aymes les forjura, qui ne l’osa laisier :
Li rois li fist jurer, ains qu’il venist arrier,
Que s’il les poïst mais ne tenir ne baillier,
Tous li ors que Dex fist, ne lor auroit mestier
Que il ne lor feïst tous les membres tranchier. »
Quant Renaus l’entendi, si se vost embromcier.
La duchoise l’esgarde, si le cort areisnier ;
Tous li sans desor li commence à formoier.
La duchoise se dresce el palais, en estant,
Et voit muer Renaut sa chiere et son samblant.
Il avoit une plaie enmi le vis devant ;
Au beourt li fu faite, quant il estoit enfant.
Sa mère le regarde, si le va ravisant.
« Renaus, se tu ce ies, que t’iroies celant ?
Biaus fius, je te conjur de Dieu, le roiamant,
Que se tu ies Renaus, di le moi erramant. »
Quant Renaus l’entendi, si s’embroncha plorant.
La duchoise le voit, ne le va puis dotant ;
Plorant, brace levée, va baisier son enfant[1]
Et puis trestos les autres .c. fois demaintenant.
Il ne desissent mot por nule riens vivant.
Donques parla la dame, si lor dist son samblant :
- ↑ 3429 À partir d’ici jusqu’au v. 3469 les initiales des lignes ont été rognées.