Et chauces de paile brun et solers botonés
Et peliçons hermins et bliaus gironés
Et molt riches mentiaus lor a sus afublés.
La duçoise lor a ses tresors defremés,
D’or et d’argent lor mostre mervellose plenté.[1]
« Vallet, ce dist la dame, icest petit prené.
Se vos n’en aves preu, je vos donrai asses. »
« A Dex, ce dist Renaus, com ber fui onques nés !
Lor a les sodoier de la tere mandés.
Cil viendront volentiers, ki erent [sejornés][2].
Cele nuit jut Renaus à Dordon la cité.
Ançois que il fust jors, en i vint grant plenté,
Tant k’il furent .vii.c. as armes conreés ;
Et la france duçoise a ses fis apelés.
Ele dist à Renaut : « Amis, or entendes.
Biax fix, laissies Baiart ; magres est et lasés,
Si maine le ton pere, ki est de grant bonté. »
« Dame, ce dist Renaus, qu’esse que dit aves ?
El Baiart ai fïance, ki molt est alosés.
Vois à seür par France, quant jo i sui montés. »
« Voire, ce dist la dame, ricement soit gardés. »
A icestes paroles fust ja Renaus montés ;
Atant es vos Maugis ki preus est et senés,
Et repairoit de France où esté ot asses.
A la cité d’Orliens ot un [tresor][3] enblés.
Quatre somiers amaine d’or et d’argent torsés.
Il avoit oï dire, et si fu verités,
Que li fil Aymon sont dedens Dordone entrés.
Venus est cele part ; es le aceminés,
Parmi la maistre porte en la vile est entrés.
- ↑ 3625 P développe cette donnée :
Vous porterez mes noches qui tant ont de bontez.
Elles valent .m. Lb. de deniers moneez.
.v.c pieres i a qui moult ont grant bontez.
Se votre avoir vos faut, si en emprunterez,
L’en vos croira bien sus .c. Lb. moneez.
Dame, ce dit Renaus, Dex vos en sache gré. - ↑ 3630 L sorjonés. A sejornez.
- ↑ 3645 L terror. A M tresor.