Bien devons estre ensanble, ço est la verités.
De cuer vos aiderai, ja mar le doteres,
Entresci et .ii. ans acomplis et passés,
Ja n’i metres del vostre .ii. deniers moneés
Ne ja vostre cheval n’erent plus tart ferrés. »
« Vostre merci, biax sire », dist Renaus li [senés][1].
Au Senescal les baille ; cil les a ostelés.
Or sunt li fil Aimon au roi Yon acointié.
Li baron en ont joie et tuit en furent lié,
Mes à petit de terme en seront plus haitié.
Beges fu à Tolose, ens el demaine sié[2],
Molt ot le cuer joiant, car il ot gaaignié.
Entre lui et ses homes forment en furent lié.
Il les a apelés, s’a cascun araisnié.
« Baron, ce dist li Turs, li blé sunt esploitié.
Des nos anemis querre somes trop atargié ;
Car cevauçons ensamble et seré et rengié.
A la [cit][3] de Bourdiaus soien[t] tost asegié. »
Et cil li repondirent : « Tot à vostre congié. »
A icestes paroles se sont aparelié,
Et furent bien .x. mile et seré et rengié,
Et cevaucent ensamble ; si ont tant esploitié
Que par desor Bordiaus se sunt tuit enbuscié.
Beges li Sarazins a avant envoiei
.iiii.c. chevalier, bien sunt aparellié.
Cil cevaucent ensamble tuit seré et rengié ;
Jusqueci à Bordiax ne se sunt atargié,
Que ils virent la vile et le demaine sié ;
Devant la mestre porte ont l’estor commencié.
Ens el mestre donjon fu li estors molt fiers.
Li rois Yus s’escria : « Segnor baron, aidies.
Veci paiene gent ; molt nos ont aprociés
Se il se vont ariere, tos serai aïriés ;
Par le mien entiant, ja mais ne serai liés »
« Sire, ce dist Renaus, or ne vos esmaies.
